ಅರ್ಧನಾರೀಶ್ವರ ಸ್ತೋತ್ರಂ PDF

श्रीगणेशाय नमः ॥ मन्दारमालालुलितालकायै कपालमालाङ्कितशेखराय । दिव्याम्बरायै च दिगम्बराय नमः शिवायै च नमः शिवाय ॥ १॥ एकः स्तनस्तुङ्गतरः परस्य वार्तामिव प्रष्टुमगान्मुखाग्रम् । यस्याः प्रियार्धस्थितिमुद्वहन्त्याः सा पातु वः पर्वतराजपुत्री ॥ २॥ यस्योपवीतगुण एव फणावृतैक- वक्षोरुहः कुचपटीयति वामभागे । तस्मै ममास्तु तमसामवसानसीम्ने चन्द्रार्धमौलिशिरसे च नमः शिवाय ॥ ३॥ स्वेदार्द्रवामकुचमण्डनपत्रभङ्ग- संशोषिदक्षिणकराङ्गुलिभस्मरेणुः । स्त्रीपुंनपुंसकपदव्यतिलङ्घिनी वः शम्भोस्तनुः सुखयतु प्रकृतिश्चतुर्थी ॥ ४॥ इत्यर्धनारीश्वरस्तोत्रं सम्पूर्णम् ।

śrīgaṇeśāya namaḥ || mandāramālālulitālakāyai kapālamālāṅkitaśekharāya | divyāmbarāyai ca digambarāya namaḥ śivāyai ca namaḥ śivāya || 1|| ekaḥ stanastuṅgataraḥ parasya vārtāmiva praṣṭumagānmukhāgram | yasyāḥ priyārdhasthitimudvahantyāḥ sā pātu vaḥ parvatarājaputrī || 2|| yasyopavītaguṇa eva phaṇāvṛtaika- vakṣoruhaḥ kucapaṭīyati vāmabhāge | tasmai mamāstu tamasāmavasānasīmne candrārdhamauliśirase ca namaḥ śivāya || 3|| svedārdravāmakucamaṇḍanapatrabhaṅga- saṃśoṣidakṣiṇakarāṅgulibhasmareṇuḥ | strīpuṃnapuṃsakapadavyatilaṅghinī vaḥ śambhostanuḥ sukhayatu prakṛtiścaturthī || 4|| ityardhanārīśvarastotraṃ sampūrṇam |

ಅರ್ಧನಾರೀಶ್ವರನ ಸ್ತುತಿ — ಅರ್ಧ ಶಿವ ಮತ್ತು ಅರ್ಧ ಪಾರ್ವತಿಯಾದ ಆ ಸ್ವರೂಪ — ಸಾಲು ಸಾಲಾಗಿ ಪುರುಷ ಭಾಗವನ್ನು (ಶಿವ) ಮತ್ತು ಸ್ತ್ರೀ ಭಾಗವನ್ನು (ದೇವಿ) ಸ್ತುತಿಸುತ್ತದೆ: ಆತನ ಭಸ್ಮ ಮತ್ತು ಆಕೆಯ ಚಂದನ, ಆತನ ಸರ್ಪ ಮತ್ತು ಆಕೆಯ ಬಳೆಗಳು, ಒಂದೇ ದೇಹದಲ್ಲಿ ಪುರುಷ ಮತ್ತು ಪ್ರಕೃತಿಯ ಸಂಗಮ.