ଭ୍ରମରାମ୍ବାଷ୍ଟକମ୍ Meaning — Line by Line

चाञ्चल्यारुणलोचनाञ्चितकृपाचन्द्रार्कपट्टोदरां चारुस्मेरमुखीं चराचरजगत्संरक्षणीं तत्पराम् । नित्यं चिन्मयकौस्तुभप्रभृतिभिर्भूषामणीभूषितां श्रीशैलस्थलवासिनीं भगवतीं श्रीमातरं भावये ॥ १॥

कस्तूरीतिलकाञ्चितेन्दुविलसत्प्रोद्भासिफालस्थलीं कर्पूरद्रवमिश्रचूर्णखदिरामोदोल्लसद्वीटिकाम् । लोलापाङ्गतरङ्गितैरधिकृपासारैर्नतानन्दिनीं श्रीशैलस्थलवासिनीं भगवतीं श्रीमातरं भावये ॥ २॥

राजन्मत्तमरालमन्दगमनां राजीवपत्रेक्षणां राजीवप्रभवादिदेवमकुटैराराधितांघ्रिद्वयाम् । राजीवायतमन्दहासवदनां राकेन्दुबिम्बाननां श्रीशैलस्थलवासिनीं भगवतीं श्रीमातरं भावये ॥ ३॥

षट्तारङ्गणदीपिकां शिवसतीं षड्वैरिवर्गापहां षट्चक्रान्तरसंस्थितां वरसुधां षड्योगिनीवेष्टिताम् । षट्कोणान्तरवर्तिनीं सुरनुतां षड्भावगां षण्मुखीं श्रीशैलस्थलवासिनीं भगवतीं श्रीमातरं भावये ॥ ४॥

श्रीनाथादृतपालितत्रिभुवनां श्रीचक्रसञ्चारिणीं ज्ञानासक्तमनोजयोगमहितां श्रीबिन्दुनादप्रियाम् । मातंगीं मधुपानलोलमनसं माहेश्वरीं श्रीप्रदां श्रीशैलस्थलवासिनीं भगवतीं श्रीमातरं भावये ॥ ५॥

लावण्याधिकभूषिताङ्गलतिकां लाक्षारसारञ्जितां सेवायातसमस्तदेववनितां सीमातिगास्थां शिवाम् । वाणीवल्लभवासवप्रभृतिभिः संसेविताङ्घ्रिद्वयां श्रीशैलस्थलवासिनीं भगवतीं श्रीमातरं भावये ॥ ६॥

धन्यां सोमविभावनीयचरितां धात्रादिसम्पूजितां वेदान्तप्रतिपादितां भगवतीं श्रीशम्भुसम्मानिताम् । नित्यं ब्रह्ममुखप्रकीर्तितयशां श्रीनारदाद्यैः स्तुतां श्रीशैलस्थलवासिनीं भगवतीं श्रीमातरं भावये ॥ ७॥

गायत्रीं गरुडध्वजां गगनगां गान्धर्वगानप्रियां गम्भीरां गजगामिनीं गिरिसुतां गन्धाक्षतालङ्कृताम् । गङ्गागौतमगर्गसन्नुतपदां गां गौतमीं गोमतीं श्रीशैलस्थलवासिनीं भगवतीं श्रीमातरं भावये ॥ ८॥