Ramalingashtakam PDF

वेदवृन्दवन्दितं वरेण्यरूपसुन्दरं धेनुदुग्धदोहफेनसन्निभं सदाशिवम् । ध्यानध्येयमप्रमेयमग्रणे(गण्)यमीश्वरं (श्री) रामलिङ्गमाद्यमीशमीश्वरं स्मराम्यहम् ॥ १॥ पञ्चवक्त्रमीदृशं भुजङ्गमेशवन्दितं भानुतारकेश्वरानलत्रिनेत्रधारिणम् । नागराजभूषणं विभूतिदेहधूसरं (श्री) रामलिङ्गमाद्यमीशमीश्वरं स्मराम्यहम् ॥ २॥ पार्वतीपयोधरप्रभाविहारलालसं क्रीडनाय शैलजार्धदेहभागभोगिनम् । उर्वशीमुखाभिरेव ताण्डवानुरञ्जितं (श्री) रामलिङ्गमाद्यमीशमीश्वरं स्मराम्यहम् ॥ ३॥ घण्टिकात्रिशूलपाशयन्त्रराजधारिणं श्रीवसन्तभैरवादिसर्वरागरागिणम् । बिल्वरुज्य(रुच्य)पद्ममल्लिकादिपुष्पपूजितं (श्री) रामलिङ्गमाद्यमीशमीश्वरं स्मराम्यहम् ॥ ४॥ नेत्रजातवेदसा प्रसूनपञ्चबाणहं दक्षयज्ञवेदगर्भ(?)मन्त्रतानुरञ्जितम् । श्रीहरं पुरापहं सुरावलीसुखप्रदं (श्री) रामलिङ्गमाद्यमीशमीश्वरं स्मराम्यहम् ॥ ५॥ धूर्जटिं त्रिलोचनं मृडाह्वयं सदाशिवं सुन्दरं वृषाधिरूढमम्बयानुरञ्जितम् । शङ्करं कपर्दिनं महेश्वरं हरं शिवं (श्री) रामलिङ्गमाद्यमीशमीश्वरं स्मराम्यहम् ॥ ६॥ ज्योतीरूपमिन्दुमौलिमङ्गलप्रदं हरं विश्वसृष्टिरक्षमीषणं महेश्वरं (रक्षणप्रणाशहेतुमीश्वरम्) । लिङ्गरूपमद्वयं(च)जाह्नवीतटी(जटा)धरं (श्री) रामलिङ्गमाद्यमीशमीश्वरं स्मराम्यहम् ॥ ७॥ तथैव विश्वनाथमेव काशिकापुरे स्थितं श्रीगिरौ च मल्लिकार्जुनेश्वरं सुरेश्वरम् । तथैव नर्मदातटे त्रिशूलपाणिनं शिवं (श्री) रामलिङ्गमाद्यमीशमीश्वरं स्मराम्यहम् ॥ ८॥ रामलिङ्गाष्टकं पुण्यं यः पठेच्छिवसन्निधौ । शिवलोकमवाप्नोति शिवेन सह मोदते ॥ ९॥ ॥ इति श्रीरामलिङ्गाष्टकं सम्पूर्णम् ॥

vedavṛndavanditaṃ vareṇyarūpasundaraṃ dhenudugdhadohaphenasannibhaṃ sadāśivam | dhyānadhyeyamaprameyamagraṇe(gaṇ)yamīśvaraṃ (śrī) rāmaliṅgamādyamīśamīśvaraṃ smarāmyaham || 1|| pañcavaktramīdṛśaṃ bhujaṅgameśavanditaṃ bhānutārakeśvarānalatrinetradhāriṇam | nāgarājabhūṣaṇaṃ vibhūtidehadhūsaraṃ (śrī) rāmaliṅgamādyamīśamīśvaraṃ smarāmyaham || 2|| pārvatīpayodharaprabhāvihāralālasaṃ krīḍanāya śailajārdhadehabhāgabhoginam | urvaśīmukhābhireva tāṇḍavānurañjitaṃ (śrī) rāmaliṅgamādyamīśamīśvaraṃ smarāmyaham || 3|| ghaṇṭikātriśūlapāśayantrarājadhāriṇaṃ śrīvasantabhairavādisarvarāgarāgiṇam | bilvarujya(rucya)padmamallikādipuṣpapūjitaṃ (śrī) rāmaliṅgamādyamīśamīśvaraṃ smarāmyaham || 4|| netrajātavedasā prasūnapañcabāṇahaṃ dakṣayajñavedagarbha(?)mantratānurañjitam | śrīharaṃ purāpahaṃ surāvalīsukhapradaṃ (śrī) rāmaliṅgamādyamīśamīśvaraṃ smarāmyaham || 5|| dhūrjaṭiṃ trilocanaṃ mṛḍāhvayaṃ sadāśivaṃ sundaraṃ vṛṣādhirūḍhamambayānurañjitam | śaṅkaraṃ kapardinaṃ maheśvaraṃ haraṃ śivaṃ (śrī) rāmaliṅgamādyamīśamīśvaraṃ smarāmyaham || 6|| jyotīrūpamindumaulimaṅgalapradaṃ haraṃ viśvasṛṣṭirakṣamīṣaṇaṃ maheśvaraṃ (rakṣaṇapraṇāśahetumīśvaram) | liṅgarūpamadvayaṃ(ca)jāhnavītaṭī(jaṭā)dharaṃ (śrī) rāmaliṅgamādyamīśamīśvaraṃ smarāmyaham || 7|| tathaiva viśvanāthameva kāśikāpure sthitaṃ śrīgirau ca mallikārjuneśvaraṃ sureśvaram | tathaiva narmadātaṭe triśūlapāṇinaṃ śivaṃ (śrī) rāmaliṅgamādyamīśamīśvaraṃ smarāmyaham || 8|| rāmaliṅgāṣṭakaṃ puṇyaṃ yaḥ paṭhecchivasannidhau | śivalokamavāpnoti śivena saha modate || 9|| || iti śrīrāmaliṅgāṣṭakaṃ sampūrṇam ||

Eight verses to the Shiva-linga worshipped by Lord Rama at Rameswaram (Ramalingeshwara) — the great linga of the southern sea, one of the holiest Shaiva shrines and a Jyotirlinga.