Paramartha Stuti Meaning — Line by Line

श्रीमद्गृध्रसरस्तीरपारिजातमुपास्महे । यत्र तुङ्गैरतुङ्गैश्च प्रणतैर्गृह्यते फलम् ॥ १ ॥

गुरुभिस्त्वदनन्यसर्वभावैर् गुणसिन्धौ कृतसम्प्लवस्त्वदीये । रणपुङ्गव वन्दिभावमिच्छन्न् अहमस्म्येकमनुग्रहास्पदं ते ॥ २ ॥

भुवनाश्रयभूषणास्त्रवर्गं मनसि त्वन्मयतां ममातनोतु । वपुराहवपुङ्गव त्वदीयं महिषीणामनिमेषदर्शनीयम् ॥ ३ ॥

अभिरक्षितुमग्रतः स्थितं त्वाम् प्रणवे पार्थरथे च भावयन्तः । अहितप्रशमैरयत्नलभ्यैः कथयन्त्याहवपुङ्गवं गुणज्ञाः ॥ ४ ॥

कमला निरपायधर्मपत्नी करुणाद्याः स्वयमृत्विजो गुणास्ते । अवनं श्रयतामहीनमाद्यं स च धर्मस्त्वदनन्यसेवनीयः ॥ ५ ॥

कृपणाः सुधियः कृपासहायं शरणं त्वां रणपुङ्गव प्रपन्नाः । अपवर्गनयादनन्यभावा वरिवस्यारसमेकमाद्रियन्ते ॥ ६ ॥

अवधीर्य चतुर्विधं पुमर्थं भवदर्थे विनियुक्तजीवितः सन् । लभते भवतः फलानि जन्तुर् निखिलान्यत्र निदर्शनं जटायुः ॥ ७ ॥

शरणागतरक्षणव्रती मां न विहातुं रणपुङ्गवार्हसि त्वम् । विदितिं भुवने विभीषणो वा यदि वा रावण इत्युदीरितं ते ॥ ८ ॥

भुजगेन्द्रगरुत्मदादिलभ्यैस् त्वदनुज्ञानुभवप्रवाहभेदैः । स्वपदे रणपुङ्गव स्वयं मां परिचर्याविभवैः परिष्क्रियेथाः ॥ ९ ॥

विमलाशय वेङ्कटेशजन्मा रमणीया रणपुङ्गव प्रसादात् । अनसूयुभिरादरेण भाव्या परमार्थस्तुतिरन्वहं प्रपन्नैः ॥ १० ॥