चिन्मय लिङ्गाष्टकम् PDF

(श्रीरुद्रकृतम्) ब्रह्ममुखामरपूजितलिङ्गं जिह्मगभूषणभूषितलिङ्गम् । सिंहमहामदमर्दनलिङ्गं चित्त सदा भज चिन्मयलिङ्गम् ॥ १॥ कनकधराधरकार्मुकलिङ्गं सनकमुखादिसुसन्नुतलिङ्गम् । दिनकरकोटिसुदीधितिलिङ्गं चित्त सदा भज चिन्मयलिङ्गम् ॥ २॥ अष्टविभूतिदमिष्टदलिङ्गं सृष्टजगत्त्रयरक्षकलिङ्गम् । अष्टमहाभयशिक्षकलिङ्गं चित्त सदा भज चिन्मयलिङ्गम् ॥ ३॥ मत्तगजाजिनवेष्टितलिङ्गं दग्धजगत्कृतपञ्चकलिङ्गम् । उत्तमपूरुषवत्सललिङ्गं चित्त सदा भज चिन्मयलिङ्गम् ॥ ४॥ अङ्गभवाङ्गसुभङ्गदलिङ्गं तुङ्गजटाभरशोभितलिङ्गम् । मङ्गलदायकमद्भुतलिङ्गं चित्त सदा भज चिन्मयलिङ्गम् ॥ ५॥ पङ्कजनेत्रसमर्चितलिङ्गं शङ्करमादिममच्युतलिङ्गम् । सङ्कटदोषनिवर्तकलिङ्गं चित्त सदा भज चिन्मयलिङ्गम् ॥ ६॥ अभ्रसभान्तरनर्तनलिङ्गं शुभ्रविभूतिविभूषितलिङ्गम् । शुभ्रहृदम्बुजशोभितलिङ्गं चित्त सदा भज चिन्मयलिङ्गम् ॥ ७॥ कुन्दवनान्तरमन्दिरलिङ्गं मन्दहसाननसुन्दरलिङ्गम् । वन्दितभक्तजनावृतलिङ्गं चित्त सदा भज चिन्मयलिङ्गम् ॥ ८॥ रुद्रकृताष्टकमद्भुतमेतद्भद्रकरं पठतीह मनुष्यः । इष्टफलं समवाप्य यथेष्टं शिष्टजनोत्तम एव हि स स्यात् ॥ ९॥ इति श्रीरुद्रकृतं चिन्मयलिङ्गाष्टकं सम्पूर्णम् ।

(śrīrudrakṛtam) brahmamukhāmarapūjitaliṅgaṃ jihmagabhūṣaṇabhūṣitaliṅgam | siṃhamahāmadamardanaliṅgaṃ citta sadā bhaja cinmayaliṅgam || 1|| kanakadharādharakārmukaliṅgaṃ sanakamukhādisusannutaliṅgam | dinakarakoṭisudīdhitiliṅgaṃ citta sadā bhaja cinmayaliṅgam || 2|| aṣṭavibhūtidamiṣṭadaliṅgaṃ sṛṣṭajagattrayarakṣakaliṅgam | aṣṭamahābhayaśikṣakaliṅgaṃ citta sadā bhaja cinmayaliṅgam || 3|| mattagajājinaveṣṭitaliṅgaṃ dagdhajagatkṛtapañcakaliṅgam | uttamapūruṣavatsalaliṅgaṃ citta sadā bhaja cinmayaliṅgam || 4|| aṅgabhavāṅgasubhaṅgadaliṅgaṃ tuṅgajaṭābharaśobhitaliṅgam | maṅgaladāyakamadbhutaliṅgaṃ citta sadā bhaja cinmayaliṅgam || 5|| paṅkajanetrasamarcitaliṅgaṃ śaṅkaramādimamacyutaliṅgam | saṅkaṭadoṣanivartakaliṅgaṃ citta sadā bhaja cinmayaliṅgam || 6|| abhrasabhāntaranartanaliṅgaṃ śubhravibhūtivibhūṣitaliṅgam | śubhrahṛdambujaśobhitaliṅgaṃ citta sadā bhaja cinmayaliṅgam || 7|| kundavanāntaramandiraliṅgaṃ mandahasānanasundaraliṅgam | vanditabhaktajanāvṛtaliṅgaṃ citta sadā bhaja cinmayaliṅgam || 8|| rudrakṛtāṣṭakamadbhutametadbhadrakaraṃ paṭhatīha manuṣyaḥ | iṣṭaphalaṃ samavāpya yatheṣṭaṃ śiṣṭajanottama eva hi sa syāt || 9|| iti śrīrudrakṛtaṃ cinmayaliṅgāṣṭakaṃ sampūrṇam |

चिन्मय लिङ्ग — शुद्ध चैतन्य के लिङ्ग — की आठ श्लोकों की स्तुति, जो शिव को रूप नहीं अपितु निराकार, सर्वव्यापी चेतना रूप में, जो ब्रह्मांड का सार है, ध्यान करती है।